Social Village

ნაკვეთზე მთავარი ობიექტია ძირითადი საცხოვრებელი კორპუსი ბინებით და საერთო ჰოლით. იქვე გათვალისწინებულია საგანმანათლებლო კლასები და ორი მცირე სახელოსნო: ტექსტილის წარმოებისათვის და სადურგლო. ტერიტორიის დანარჩენ ნაწილზე განლაგებულია სამი ტიპის საცხოვრებელი სახლები, მკაფიოდ განსაზღვრული ნაკვეთის საზღვრების გარეშე. ტერიტორიაზე ასევე გათვალისწინებულია სპორტული მოედნები, ტერასები იოგასთვის და ფილმის საყურებლად, საყოფაცხოვრებო ნაწილი.

მნიშვნელოვან როლს თამაშობს პროექტის განხორციელების ბიუჯეტიც. ამიტომ, შენობების კარკასები ხის კონსტრუქციებითაა აწყობილი. ხოლო, ტერიტორიის კეთილმოწყობა შეძლებისდაგვარად ინტეგრირდა არსებულ ლანდშაფტში.

საცხოვრებელი კორპუსის პროექტირებისას, ჩვენი ამოცანა იყო, სივრცის ფუნქციური ორგანიზებისას მინიმუმამდე დაგვეყვანა საზოგადოდ მიღებული შეხედულება სოციალური (საერთო საცხოვრებლები და თავშესაფრები) საცხოვრებლებისადმი. ერთ-ერთი ხერხი, რომელიც ჩვენ გამოვიყენეთ აღნიშნული მიზნის მისაღწევად, არის შიდა ეზოების მოწყობა ინდივიდუალური გასასვლელებით ბინებიდან კორპუსის გარშემო არსებულ ტერასა-გალერეებში.

ინდივიდუალური საცხოვრებელი სახლები ფართების მიხედვით იყოფა სამ ტიპად და განკუთვნილია სხვადასხვა შემადგენლობის ოჯახებისათვის. გეგმარებითი გადაწყვეტა ჩამოყალიბებულია ადამიანის საბაზისო მოთხოვნილებებიდან გამომდინარე. ამასთანავე, თითოეულ სახლს გააჩნია საკუთარი ტერასა.

კომპლექსი ბუნებრივად ინტეგრირდება არსებულ გარემოში და იმეორებს ადგილობრივი ლანდშაფტის სილუეტს. ეკონომიის მიზნით ფილები შეიცვალა ხრეშის საფარით. სანავიგაციო სტენდები, საჩრდილობლები დასასვენებელი ზონებით, საბავშვო მოედნები და შესასვლელები შესრულებულია ხის მასალით, რითიც იმეორებს ძირითადი შენობების სტილსა და ესთეტიკას.